Andiko: Mathayo 7:15: “Jihadharini na manabii wa uongo, watu wanaowajia wamevaa mavazi ya kondoo, walakini kwa ndani ni mbwa-mwitu wakali.” Ninaomba maisha yenu yajazwe upendo na baraka za Mungu.

Leo ningependa kushiriki nanyi neema kupitia ujumbe wenye kichwa “Mtu Aliyevaa Sura ya Kondoo.” Wakati wa Yesu, waandishi na Mafarisayo waliwafundisha Waisraeli Sheria kwa utaalamu. Hawakushika Sheria tu bali pia mila za wazee wao walizorithi kutoka kwa baba na babu zao—kanuni na maagizo mbalimbali.

Zaidi ya hayo, walijaribu kujizuia daima na kuyadhibiti maisha yao, hivyo walijiona kuwa wacha Mungu. Lakini Bwana wetu Yesu aliwakemea vikali, akisema walifanana na makaburi yaliyopakwa chokaa. Waisraeli walijenga makaburi yao ndani ya mapango na kupaka chokaa sehemu za kuingilia. Makaburi hayo yalionekana safi na meupe, lakini ndani yalikuwa yamejaa mifupa ya wafu, harufu mbaya na uchafu wa kila aina.

“Makaburi yaliyopakwa chokaa” yanawakilisha watu wanaoonekana watakatifu kwa nje, lakini mioyo yao imejaa uovu na dhambi za aina mbalimbali. Bwana wetu Yesu alisema kwamba watu hao huwajia wengine wakiwa wamevaa mavazi ya kondoo, lakini kwa ndani ni mbwa-mwitu wakali. Mungu anataka uwe na uzuri na utauwa si kwa nje tu, bali pia moyoni mwako.

Katika 1 Samweli 16:7, Mungu alisema, “Mwanadamu huitazama sura ya nje, bali Bwana huutazama moyo.” Kwa hiyo, anataka kweli uutakase moyo wako. Hakuna anayependa hata kuona uchafu wenye uvundo au minyoo mibaya, sembuse kuviona vitu hivyo vichafu na visivyo safi kwenye nguo au mwili wake! Bila shaka utajaribu kuvifuta au kuviosha.

Basi, vipi kuhusu dhambi zako? Dhambi zisizopatana na mapenzi ya Mungu, kama vile chuki, kiburi, uzinzi na ukosefu wa haki, ni chafu sana kuliko minyoo na uchafu. Ukizikuta ndani yako, ufanye nini? Ukiona chuki moyoni mwako, usijaribu kuiondoa kwa nguvu tu; badala yake, badilisha hisia hiyo iwe nzuri.

Mtu akikupiga, unaweza kufikiri kwamba amekupiga si kwa chuki bali kwa upendo; hapo hutamchukia na utaweza kumtendea mema. Ukiona una kiburi, usijaribu tu kukiondoa bila kuelewa; badala yake, wahesabu wengine kuwa bora kuliko wewe. Unapowatumikia wengine, kiburi kitatoweka na utaweza kuwatumikia kutoka moyoni.

Kama 1 Wathesalonike 5:22 inavyosema, “Jiepusheni na ubaya wa kila namna,” tupa mbali moyo unaopingana na kweli na uwe na moyo wa kweli na mwema. Kama vile nyuki na vipepeo wanavyokusanyika kwenye maua matamu yenye harufu nzuri, ninaomba kila mmoja wenu awe na harufu tamu ya moyo wa kweli na mwema, ashiriki furaha na watu wengi kupitia harufu hiyo, na apokee na kufurahia upendo na baraka za Mungu kwa kipimo kamili. Ninaomba haya katika jina la Bwana wetu Yesu Kristo!

    His Emeritus Bishop Dr. Jaerock Lee